الاثنين، 16 مايو 2011

شاورما




المقادير

صحن صدوور دجاج مخلي مقطع شرائح عرضيه

فص ثووم واحد مقطع شرائح رقيقه

ليمونه مقطعه شرائح رقيقه ومزال منها البذر

ملعقه صغيره من (( كمون + كركم + بابريكا + فلفل اسود + سماق + فلفل حر << اختياري ))

ونص ملعقه صغيره من (( ليمون اسود + ومسمار محطوون + ورشة هيل ))

وملح على حسب الذووق

ونص كاس زيت زيتون

(( ناخذ بصلتين مقطعه شرايح + ملعقه صغيره ليمون اسود وملعقه صغيره سماق ))

ونتركها على جنب ..



الطريقه

بعد ما نشرح الدجاج ونغسله ننقعه في ملح ومويه مدة 10 دقايق ثم نغسله

ولاحظوا ملح النقع راح يترك شوية طعم على الدجاج يعني اوزنوا ملح التتبيل عدل

لا يكون مالح مره ..

ناخذ الدجاج ونزيد ليه كل المقادير السابقه نتركه في الثلاجه ليله كامله

او نزينه من الظهر ونسويه با الليل ابي الدجاج ياخذ التتبيله عدل وهذا سر النكهه

بعد ما يتتبل ناخذ كل شريحه ونثنيها على بعض يعني نحط الطرف على الطرف

وتصير عندنا طبقتين من قطعه وحده ونشكشكها في 3 اعواد شوي خشبيه

ونكمل الدجاج ونحاول بين كل مجموعه نحط شريحة ليمون

اذا اكتملت عندنا الاسياخ ناخذ بصله كبيره ونقص قاعها دون ما نقشرها

ونستخدمها كا مثبته للاسياخ أو نستخدم الطريقة الثانية مثل اللي بالصورة

ناخذ البصل اللي قطعناه جوانح ومزجناه مع الليمون الاسود والسماق ونفرش

به صينية الفرن ونحط الدجاج ونرش عليه زيت زيتون وندخله للفرن تقريبا 35 دقيقه

على حرارة 180  واذا استوى الدجاج وتحمر نطلعه ونلفه بقصدير

ملاحظه :- نلف الدجاج مو نغطي الصينيه ونتركه داخل الفرن وهو مطفيئ اللهم انه دافي

عشان يكتسب نكهه غير طبيعيه ها الخطوه مهمه وشوفو شكله اممممممممممم


نقدمه مع البطاطا والصوصات المفضلة 



وممكن نلفه في خبز انا سويت خبز التورتيلا




وبـــس اتمنى تكون ها الشاورما على ذووقكم وتعجبكم













العصير البنفسجي

مرحبا ..




المقادير: والطريقة:
كركديه ( غجــر ) .. نقوم بأخذ 3 ملاعق كبيرة منه وننقعه في ماء مغلي مقدار كاس ! ولما يبرد الماء نصفّـيه ونصبه في كوب ونخلي على جنب شوية..
نجيب علبة اناناس جاهزة
اذا هي علبة صغيرة ناخذها كلها واذا علبة كبيرة 4 حبات كفاية لكن ماننسى ناخذ من الماء اللي في العلبة مقدار نص كوب  ..

نجيب الخلاط الكأس ونصب فيه ماء الكركديه + قطع الأناناس وماء الاناناس + ملعقة سكر او اكثر حسب الرغبة وثلج مجروش او بدون ثلج كيفكم
ونخلطه كويس وبنلاقي تكونت رغوة فوقه.. واذا مانحب لونه غامق ممكن نضيف كم ملعقة من ايس كريم الفانيلا الساده عليه أو حليب السعودية 

ويقدّم باااارد
وبالهناء والشفاء    



الجمعة، 22 أبريل 2011

توست بالخضار

هاي ..

اليوم الوصفة سهلة جدا جدا وماتاخذ وقت في التحضير 
الوصفة كانت خالتي الله يحفظها تسويها أيام زمااان 
طبعا انا عندي خالتي ماشاء الله نفسها حلو بالأكل (خالتي اللي في تبوك ) 
أنا أضفت مع الخضار دجاج مسلوة مع بهارات ومفتتة 
وتقدري تضيفي لحم مفروم تسويه مع بصل وبهارات او مع حمسة كاملة 

 المقادير على حسبك انتي تفضلي الخضار تكوون كثييرة أوقليلة


الطريقة :
توست منزوع الحواف وتصفية في طبق وتدهنيه بشوية جبن سائل أو جبن ومايونيز مع بعض
وبعدها طبقة الدجاج أو اللحم وممكن الاستغناء عنهم
وتوزعي طماط وخيار ويكونو مقطعين صغااار مرره أحلى وزيتون أسود
بعدها تدخليها الفرن عشان تذبل الخضار شويه وتصير حار وتقرمش طراف التوست طبعا من فوق ولعي ع الشواية تقريبا مدة 6 دقايق
آخر شي طلعيها ورشي عليها جبن شيدر لا أحد يفكر يحط جبن موزاريلا
وغطيها بصحن أو قصدير عشان تذوب الجبنة وقدميها فورا
اذا ماتحبين الجبنة ذايبة مو مشكله مايحتاج تخليها تذوب ..




الثلاثاء، 5 أبريل 2011

عجينتي المعتمدة + توجد فطيرة مجانا بالداخل ^_*

العجينة معتمدة عندي من زمان وتصلح لكل أنواع المعجنات وحتى البيتزا والسيانبون بعد ..

المقادير:
3 كاسات دقيق متعدد الاستعمال(كويتي) الكاس اللي استخدمته  كاس الجبن الصغير (جبن السائل)
كاس ونصف ماء
3ملاعق كبيرة سكر + حليب بودرة 
رشة ملح
ملعقه وسط خميرة حبيبات + باكنج باودر 
بيالة زيت 


الطريقة:
تذوبي الخميرة مع الموية وتضيفي السكر والحليب وبعدها الزيت وتخلطي وبعدها تضيفي الدقيق والملح والباكنج بودر 
واعجني لمدة 5 او 10 دقائق بيدك أفضل لين تحسي العجينة صارت لينة ومطاطة 

إذا حسيتي العجينة قاسية ضيفي شوية موية وإذا العكس اضيفي شوية دقيق ..


شكل العجينة قبل لاتخمر اول ماعجنتها


حطيها في صحن مدهون بشوية زيت عشان لاتلصق العجينة وادهني العجينة نفس شوي بشوية زيت وبعدها غلفيها بنايلون واتركيها تخمر 

بعد ماخمرت 




خلاص وصلحي  فيها اللي تبين انا توني الليله مسويتها سويت فطيرة على طريقة أريام 

مقادير الحشوة:
دجاج مخلي من العظم والجلد ومقطع صغير

بصلة مقطعه

فصين ثوم مهروسين

فلفل احمر مقطع مكعبات

فلفل اخضر مقطع مكعبات

فطر مقطع صغير 

الطريقة: 
نبدأ نحمس البصل بشوي زيت وبعد ما يذبل نحط الثوم وما نطول حمس نضيف الدجاج على طول 
بعد ما نحط الدجاج نضيف عليه فلفل اسود مطحون طازج 
نقلب لين يتغير لون الدجاج ويبدأ ينشف من المويه بعدها نضيف عليه فلفل احمر حار مطحون ,, وبعدها نضيف باقي الحشوة والملح ونقلب شوي
ماكان عندي فلفل احمر واستبدلته بالكاري


هذا شكل الحشوة بعد ما استوت ( ما نخلي الخضار تذبل يا دوب تشويح مع الدجاج )
نقسم العجينة وناخذ اول قسم ونرش عليه دقيق
نفردها على شكل مستطيل ( مو لازم يكون مستطيل منتظم ) بعدها نحط الحشوة على الطرف

بعدها نرش الحشوة بجبن موزريلا سلايس بشكل شرائح فوقها ,, بعد كذا ناخذ عجلة تقطيع البيتزا ونعمل فتحات بشكل مائل لكن ما نقطع العجينه كلها ,,نسوي فتحات بس 
بعد كذا نطبق العجينه على الحشوة ونحاول نوسع الفتحات شوي 
بعجلة البيتزا نعدل الاطراف ونقطعها عشان تلصق ببعض واذا احتاج الامر اضغطي عليها بيدك عشان نغلق العجينه وما تطلع الحشوة من الاطراف 
نخليها 10 دقائق وبعد كذا ندهنا(بحليب أو صفار بيضة )

ونرش السمسم للي يحبه

ندخلها فرن ساخن ونخليها لين تستوي وتتحمر ,, هذا شكلها وهي توها طالعه من الفرن 
نشيلها على شبك عشان ما تترطب وتلين من تحت 
شكلها من الداخل

دمتم بحب ونقآء...

الجمعة، 1 أبريل 2011

طريقة الاشتراك في المدونه بطريقة جديدة

طبعا مثل ماهو واضح اذا حبيتي تشتركي بعدها تقدري تعلقي في أي مدونه غير مدونة ندى المذآق الطيب 
هذي الطريقة أفضل من الطريقة السابقة اللي فيها انسخي الرابط والصقي وغيره 
إذا اشتركتي راح يكون اسمك تبع قائمة المشاركون اللي على جهة اليمين من المدونة 


1-  أول شي تضغطي على كلمة اشتراك

2- راح تفتح لك صفحة 
 تختاري أيقونة قوقل

3- وبعدها بيجيك أختاري أنشئ حسابا مجانيا




4- بتجيك صفحة البيانات عبيها كلها اللي هو البريد الالكتروني وكلمة المرور وتاريخ الميلاد....الخ


5- بعد ماتخلصي آخر الصفحه جملة أنا موافق أنشئ حسابي ضغطي عليها

6- راح تجيك صفحه تطلب منك رقم الجوال عشان يرسلون رمز التحقق .. 
أنا بالأول ترددت ارسله اولا خفت بس الموضوع ترى عادي ارسلوه وموثوق 
كتبي رقم الجوال واختاري إرسال رمز التحقق إلى هاتفي الجوال 



7- ثواني وبتجيك رساله على جوالك فيها رمز اكتبي الرمز في المربع 
واختاري إثبات الهوية


 8- اختاري الاسم اللي تبيه (اسم العضوية ) مثلا ريم علي 
واختاري اشترك في هذه المدونه

9- اختاري تم 
مبروووك اكتمل التسجيل .. وبعدها راح تشوفي اسمك تبع قائمة المشاركون 



دمتم ...

الأحد، 27 مارس 2011

كيكة الموز


كيكة هشة وغنية بنكهة الموز 
زوجي عجبته وقال يبي ياخذ الدوام مثلها 
وفي نفس اليوم رحت بيت اهلي واخذت معي وذاقها ابوي وسأل إذا في بعد نفس الكلام يبي ياخذ معه الدوام


المقادير :
كوب سكر
نصف كوب زيت
بيضتان ورشة فانيلا
3 حبات موز ناضجة
نصف كوب حليب سائل + ملعقة عصير ليمون
كوبان وربع طحين منخول
ملعقة طعام بيكنج باودر +ملعقة صغيرة بيكربونات الصودا + رشة ملح وقرفة



الطريقة :

نخلط السكر والبيض والفانيلا جيداً .. في خلاط الكأس
ثم نضيف الزيت ثم الحليب والليمون والفانيلا ونخلط جيداً

ثم نضيف قطع الموز ونخلط
 نضيف رشة القرفة ونخلط 
وبعدها ناخذ الخليط اللي في الكأس ونصبه في بادية 
ثم ننخل الدقيق والملح والبيكنج باودر والبيكربونات
ونصب فوقهم الخليط السائل اللي في خلاط الكأس ونخلط على أقل سرعة لمدة دقيقة إلى دقيقة ونصف>>في خلاط الكيك
نصب الخليط في القالب بعد دهنه ورشه بالطحين

انا استخدمت قوالب الكب كيك

ندخلها الفرن وماتاخذ وقت لحتى تستوي 


عندك خيار إما تخليها سادة أو تزينيها بسكر بودرة  

أو بكريمة 


طريقه الكريمة  هاذي تصلح لاي كيكه وطعمها امممممممممم


الطريقه:

5 قطع جبن كيري او 100 جرام فيلادلفيا اذا تحبين

3/4 كوب سكر ناعم

من 1 الى 2 م ص مبشور قشر الليمون

4 م ك حليب

اخفقيهم بالخفاقه لغايه ماتنعم وزيني بها الكيك

انا حطيت فوقها شكولاته غامق و فاتح 





وجوز 





الأربعاء، 23 مارس 2011

الأرز البخاري


سهل جدا وماياخذ وقت وأحلى من المطعم 
المطعم بس لونه برتقالي اما الجزر ماله أثر 
وتقدري تقدمي معه دجاج أولحم مشوي أو سمك مغلي أو كباب

المقادير : 
كوب رز يقابلها كوبين ماء أو على حسب نوعية الرز اللي عندك 
ثلاث أرباع الكوب جزر مبشور وإذا تحبيه باين مثلي كثري  
ملعق صغيرة من البهار المشكل 
و بهارات صحيحة (قرنفل 3 حبات / هيل حبتين / قرفه )
3 ملاعق كبيرة زيت
ملح


الطريقة :
على نار هادئة الزيت مع نص كمية الجزر والبهار العادي والصحيحة  والملح وتخليه لحد مايذبل وتطلع نكهة البهار
تقريبا 5 دقايق .
بعدها تضيفي الموية وإذا غلت تضيفي الرز وباقي الجزر وتهدي النار لين ينضج الارز وتنشف كل الموية .


هنا قدمته مع كباب في ذا اليوم كانوا خواتي موجودين وعجبهم


واليوم توني مسويته مع دجاج مشوي







الاثنين، 21 مارس 2011

أكلتي المفضلة Pizza (شرح كامل وبالتفصيل )



كل شخص عنده مفهوم مختلف للعجينة المثالية . فيه مقولة مشهورة تقول إن أطعم بيتزا هي أول بيتزا أكلتها في حياتك ! وهي منطقية صراحة ، الفكرة فيها هي إن الواحد دايما يقيس على الشي اللي ذاقه قبل ويقارن فيه . و الشي الثاني فيها هو إن مافيه مقاييس أو قواعد للبيتزا بقدر ماهي خطوط عامه . البيتزا اللي في نيوورك غير بيتزا شيكاغو ، غير بيتزا نابولي في إيطالي و المشكلة إن كل واحد يقول أنا الصح ! . بس فيه أشياء في كل بيتزا المفروض تكون موجوده ... أول شي عجينة البيتزا المفروض " ما تستسلم للجاذبية نقرتين لعرض الصورة في صفحة مستقلة " يعني إذا شلتي قطعة المفروض تكون واقفة ما تكون طايحة ولينة . النقطة الثانية وهي إنها لازم لازم يكون لها قشرة من برا يعني المفروض مهما كانت البيتزا حقتك تكون تقرمش من برا ما تكون زي التوست لين ! . النقطة الثالثة هي إنها تكون مطبوخة من جوا ما تكون عجين ني . غير كذا خذي راحتك حطي عليها اللي تبين . سويها بالحجم و المتن اللي تبين . ألفي في شكلها سويي اللي تبين ....

الوصفة اللي راح أكتبها هذي وصفة أساسية للبيتزا ، تقريبا كل مطاعم البيتزا تستخدم وصفة قريبة من هذي

*** عجينة البيتزا ***


المقادير :

كوب وربع مويه دافية ..

ملعقة صغيرة سكر

ملعقتين ونص خميرة

ملعقتين كبار زيت زيتون بكر

ملعقتين صغار ملح .

٣ أكواب وربع طحين أبيض يفضل وبشده لو يكون طحين خبز
نص كوب سميد يفضل سميد بس لو ما عندك يمديك تبدلينه بطحين أسمر 


شي ثاني لو تبين تدخلين نكهات على العجينة يمديك .. جربي تحطين شوي بودرة ثوم ، أو حتى أعشاب جافة مثل الأوريجانو أو الريحان أو غيرها . طبعا إختياريه بس لو تحبين .

الطريقة :


أول شي نذوب الخميرة في المويه مع السكر ونخليها إلين تبدأ الرغوة تطلع وبكذا نتأكد إن الخميرة ما زالت حية .

بعدين نضيف لها الزيت ، الزيت هنا راح يعطي شوي ليونه للعجينة وبنفس الوقت طعم .

بعدين تخلطين معاها نص السميد و شوي من الطحين وتخلطين بخطاف الخبز لو كنتي بتستخدمين عجانة أو ملعقة لو كنتي بتستخدمين يدك . هذا بيكون شي يسمونه الإسفنجه . الحين أخلطي باقي المكونات شوي شوي إلين تنخلط كلها . طبعا بالبيد راح تكون شوي متعبة في البداية بس بعدين راح تلين معاك . عند هذي المرحلة العجينة راح تكون خشنة شوي ويمكن تلصق شوي ( يعتمد على الطحين وعمر الطحين و الرطوبة في الجو ... إلخ )


الحين المرحلة المهمة العجن . ناس كثير ما يهتمون بهذي الخطوة . 

لو عجنتي أقل من المطلوب .. النتيجة بيتزا تتفتت نقرتين لعرض الصورة في صفحة مستقلة بدال ما تكون قويه وماسكه نفسها . عشان كذا إعجني إلين تسير العجينة لينة و تنمط بسهولة معك . ولازم بعد هذي المرحلة تصير العجينة ناعمه من برا .
العجن يفضل يكون باليد .. سواء عندك عجانة أو ما عندك أستخدمي يدك نصييييييحة ... العجانة مهمها كانت ممتازة ما تقدر تعجن زي اليد أبدا .. أو على الأقل خليها تنعجن بالعجانة أول ٥ دقايق بعدين كملي الباقي بيدك . راح تحسين بالعجينة وهل هي لينة أو لأ عكس لو كانت بالمكينة . أعجنيها إلين تصير لينة وناعمه من برا .
النقطة الأخيرة : لا تستخدمين طحين و أنتي تعجنين !!! أبدا لا تستخدمين طحين ... العجينة ماراح تلصق لا تخافين . الطحين اللي راح تستخدمينه صح راح يريحك في العجن أول شي بس راح يدخل في العجينة وهذا بيخليها قاسيه وراح تحتاج عجن لمدة أطول وبكذا كأنك تصعبين على نفسك غير إنك راح تخربين الطعم بعد .

آخر شي إدهني صحن بشوي زيت زيتون بعدين شكلي العجينة على شكل كورة و حاولي تشكلينها زيييييين بحيث تكون كورة كورة ومشدودة زين عشان تنفش صح بعدين أدهنيها بطبقة خفيييييييييييفة زيت زيتون وحطيها بالصحن اللي دهنتيه . الصحن ممكن تستخدمين أي شي بس أهم شي لايكون كبير مرة بحيث إن العجينة بدال ما تنفش تفرد بالعرض !! ولا يصير بحيث تطلع من فوق . أستخدمي صحن مناسب و غطيه بنايلون أو منشفة رطبه وحطها في مكان دافي إلين يتضاعف حجمها.

أحسن نتيجة واللي أنصح فيها وبشده ، هي إنك تغطين الصحن بنايلون وتحطين العجينة في الثلاجة إلين ثاني يوم طبعا بعد ماتخمرالعجينة . الخميرة راح تاخذ وقت أطول مع العجين وهذا بيبني طعم لذييييذ ، غير كذا الطحين في الثلاجة مع الوقت راح يشرب المويه صح . النتيجة راح تعطيك عجينة لذيذة و ماراح تتعبك في الفرد أبدا .
ثاني يوم طلعي العجينة من الثلاجة قبل الطبخ بساعتين عشان ترجعين العجينة لحرارة الغرفة .

يمديك للمعلومية بعد تفرزين العجينة عند هذي المرحلة . أدهنيها بشوي زيت بعدين حطيها في كيس وعالفريزر طبعا قصدي قبل ما تخلينها تنفش. بعدين إذا بغيتيها طلعيها قبلها بيوم وخليها في الثلاجة إلين ثاني يوم . وبعدين كملي كأنك حاطتها في الثلاجة عادي .


هذي العجينه بعد مانفشت طبعا صورتها قبل ماتنفش بس ماادري وين طارت الصورة



الحين نجي للصلصة ، فيه صلصات كثير وكل واحد بيقولك شي غير ، جربت انواع كثييييرة واحسن عجبتني هذي ، خليها تطبخ زياده عشان تثقل أكثر لو تبين ، لو تحبينها شوي حارة زيدي فلفل حار . بس الخيارات كثيرة عندك يمديك تستخدمينها زي ما هي ويمديك تعدلين عليها . 

الصلصة :
بصلة صغيرة مفرومه
وثوم مفروم فص صغير
2طماطم الحجم الكبير منزوعة القشر والبذور
2م ك معجون طاطم و كاتشب
فلفل 
بيالة موية
م وسط بهار مشكل 
2م ك بقدونس مفروم 


الطريقة :
أول شي تحمسين البصل لين يذبل من غير مايتغير لونه وتضيفي الثوم 
وبالخلاط تطحني الطماطم وتضيفيها على البصل وبعدها تضيفي الموية 
ومعجون الطماطم والكاتشب والفلفل وتخليها تطبخ لين تتكثف آخر شي 
تضيفي البهار والبقدونس وتخليها بس دقيقة وتطفي النار . 



الحين جهزي باقي أغراضك اللي بتحطينها فوق البيتزا .

  أول شي تسوينه رشي شوي طحين على الطاولة اللي تشتغلين عليها و أبدي قسمي العجينة . هذي العجينة راح تسويلك ٣ بيتزات وسط بس يمديك تسوين منها ٤ بيتزات وسط وتفردينها نحييييييييفة لو تحبين . وطبعا يمديك تقسمينها أصغر وتسوين بيتزات صغار لو تحبين . الحين قسمي العجينة بعدين شكلي كل قسم على شكل كوره مره ثانيه وخليها ترتاح ربع ساعة عشان تسير أسهل بالفرد . 


الحين نجي للفرد . أفضل طريقة لفرد العجينة هي باليد ، موب بالعصا حقت العجين ، يمكن أول مرة تلاقينها شوي صعبة خصوصا اللي ما يعجنون دايما بس صدقوني مع الوقت بتسوونها وأنتم مغمضين . عصا الفرد ينفع بعد تستخدمينها هنا بس نصحية حاولي تتعلمين باليد أول ، عصا الفرد ماراح تمط العجين زي اليد ولا راح تطلع الهوا من العجين زي اليد . 
 
عشان ما يتعبك العجين في الفرد ، حاولي تعطينها وقتها وهي ترتاح ووقتها وهي تتخمر ، لو ما تخمرت زين راح تتعبك في الفرد . ثاني شي العجينة الباردة راح يكون صعب جدا فردها ، عشان كذا لو كنتي مسويه عجينتك في الثلاجة تأكدي إنها وصلت لحرارة الغرفة قبل ما تبدين تشكلين العجين . ثالث شي لو لقيتي إن العجينة كل ما فردتيها ترجع زي ما كانت أو لقيتيها ما تستجيب لك ، خليها على جنب ١٠ دقايق. هذي القوعد موب بس في البيتزا هذي لفرد العجين عموما .


طيب الحين خوذي كور العجين اللي شكلناها و شكليها على شكل قرص أول شي بعدين ، غطسيها بصحن فيه طحين أو بعد أفضل سميد عشان يسحب الرطوبة اللي على الوجه وبكذا ما تلصق بيدكنقرتين لعرض الصورة في صفحة مستقلة أو بالصينية و أنتي تحطينها في الفرن . بعدين أبدي شكليها

صعب أشرح بالكلام لازم فيديو شوفوا هذا الفيديو ، جدا واضح ولايهمكم وش يقول أهم شي شوفوا كيف يمط العجين بس .



http://www.youtube.com/watch?v=72oe_j-0gwE&feature=player_embedded#

الحين أبدي حطي مكوناتك أول شي طبعا الصلصة ، أنتبهي أنتبهي أنتبهي إنك تكثرين صلصة .... راح تخرب كل شغلك . طبقة خفيفة تكفي صدقيني . بعدين الخضار لو عندك بعدين الجبن و بعدين آخر شي اللحوم فوق .

المطاعم ما عندها سر في نوع ،الجبن موب نوعية جبن سرية ... هي بس نوعيه موزاريلا جيدة لا أكثر .... وش أحسن نوع ؟ والله ما أدري جربي وشوفي . لو تبين بعد نتيجة أطعم ، أحسن جربي تستخدمين موزاريلا 
بس لو سمحتوا لو سمحتوا ما نبي جبن سايل وجبن كيري !!!! 

بالنسبة للحوم ، إذا كانت تاخذ وقت عشان تستوي مثل الدجاج تأكدي إنك تستخدمين لحم مطبوخ كونها يمكن ما تستوي في الفرن . غير كذا خذي راحتك بالمكونات وحاولي تجددين ، الخيارات كثير ليش تحدين نفسك بنوع واحد ؟
شي ثاني شي أكرهه و ما أطيقة هو إن الناس تربط الطعم بكثرة المكونات . مكون أو مكونين تمشي مع بعض أحسن من مليون مكون تتعارض مع بعض

 فكري بمكوناتك وكيف راح يكون طعمها مع بعض وصدقيني الكثرة ما تعني طعم أحسن . كمية المكونات بعد لا تكثرين منها !! هذي بس زيادات موب الأساس في البيتزا . الأساس هو الجبن و الصلصة و الأهم العجينة موب الإضافات اللي فوق !!!! . لا تكثرين مررره من كل شي خليها بكميات بسيطة أطعم صدقيني

الحين راح أعطيكم نماذج للبيتزا أنا تعجبني أنصحكم تجربونها إن شاء الله ماراح تندمون . الخيارات كثييييييييييييييرة ومستحيل أغطي كل أنواع البيتزا  بس بعطيكم أنا بيتزاتي المفضلة . ياليت لو كل وحدة تكتب وش أكثر بيتزا تحبها هي عشان تشوفون كيف الناس أذواق في البيتزا .


نقاط سريعة :

** تأكدي إنك تعجنين العجينة وقت كافي .

** تأكدي إنك تفردين البيتزا صح .

** سخني الفرن على أحررررر شي يوصله ومن تحت بس !!! مايحتاج من فوق عشان ما تتحمر من فوق قبل تحت وتنحرق ! لو سخنتوا الفرن من تحت على أحر شي راح تتحمر البيتزا من فوق تلقائيا .. أكرررر ما يحتاج تحمرون البيتزا ! ...


** لا تكثرون من الصلصة عشان ما تخرب العجينة .

** لا تكثرون من المكونات  .

** البيتزا يفضل تنوكل في وقتها .

*** Pizza Margarita ***
*** بيتزا مارجاريتا ***




أول شي عندنا هو بيتزا المارجاريتا ، البيتزا هذي على إسم آخر أميرات إيطاليا مارجاريتا كانت مسويه زياره لمدينه وسوو البيتزا هذي إحتفال بها . لو لاحظتوا راح تلاقون العلم الإيطالي في البيتزا هذي الأحمر ( الصلصة ) ، الأبيض ( العجينة و الجبنة ) و الأخضر ( الريحان ) أو ممكن تستخدمي الاوريغانو. هذي البيتزا على بساطتها إلا إنها لو تسوت صح تطلع جدا جدا لذيذة وموب مملة زي ما ناس كثير يعتقدون . أنا أستخدمت هنا صلصة + جبن موزاريلا عادي +  . وبعدين آخر شي بعد ما تطلع من الفرن حطين ورق ريحان طازج و  وزيت زيتون  . أنا حطيت أوريغانو







 *** بيتزا الخضار ***
*** Vegetable Pizza ***
طبعا معروفه عند الكل صلصة وخضار (فطر وطماط وفليفلة وزيتون ) وجبن

*** بيتزا فاهيتا الدجاج ***
*** Chicken Fajita Pizza ***
المقادير  :
انا استخدمت صدر دجاج تتبليه بملح وفلفل اسود لو تحبين و بهار الفاهيتا اذا عندك وممكن تستبدليه بالبهار العادي
ناخذ فلفل الوان ونقطعه على شكل اعواد مع حبة بصله مقطعه شرائح وثوم مدقوق 
ملعقتين كبار من الصلصة ونضيف لها ملعقة كبيرة من سور كريم واذا ماعندك سور كريم اسبدليها بملعقتين وسط لبنة وملعقة
زبادي وتخلط لين تتجانس

نحضر نوعين من الجبن الموتزريلا والشيدر مبشوره 
 الطريقة:
ناخذ صدور الدجاج ونشوحها في قليل من الزيت الى ان تستوي من الجهتين  
 نتركها الى ان تبرد ثم تقطع على شكل اصابع 
نشوح البصل والفلفل والثوم في نفس الصينيه اللي شوحنا فيها الدجاج الى ان يذبل شوي ونضيف شوي بهارات  
 
 نفرد العجينه وندهنها بخليط السور كريم 
 نرش الجبن بنوعيه 
 

 نوزع الفلفل والبصل ثم الدجاج ونرش شوي زيت زيتون عليها 
 
 وهذا شكلها 
 
 
أمثلة البيتزا كثير وش أقول ووش أخلي ! شغلي عقلك و ألفي على راحتك بس أهم شي تكونين حاسبتها صح قبل !!! بس ...... جربي و إذا أكتشفتي أي نكهات جديدة نزليها هنا علطوووووووول .
هذا تقريبا كل شي عن البيتزا ... أو كل شي أنا أعرفه .. فيه أشياء كثييييييييير ووصفات كثير ما ذكرتها . 
أتمنى يكون شرحي واضح ولو عندك أي أي أي ملاحظات لا يردكم إلا لسانكم .......
 
إن شاء الله لي موضوع ثاني أنزل فيه أنواع ثانية للبيتزا